မောင့်ကို ပြောပြရဦးမယ်

(က) အချစ်နှင့် ရင်ခုန်သံအကြောင်း

ရင်ခုန်သံဆိုတာ အချစ်သက်သက်ကြောင့်တော့မဟုတ်ဘူး… မောင်။ ရင်ခုန်တာဟာ အချစ်မဟုတ်ပေမယ့် အချစ်ဆိုတာကတော့ ရင်ခုန်သံတချက်ပါပဲ။ ဆိုလိုတာက မောင်ဟာ ကျမရင်ကို ၀ုန်းဝုန်းဒိုင်းဒိုင်း လှူပ်ရှားစေတတ်သူမဟုတ်ပေမယ့် မောင် ကျမကို စိုက်ကြည့်တဲ့အချိန်ပဲဖြစ်ဖြစ်၊ စကားလှမ်းပြောတဲ့အခါပဲဖြစ်ဖြစ် ကျမ ရင်ကိုနွေလေပြေအေးတချက်တိုက်သလို အေးမြစေတာတော့ အမှန်ပါ။ ကျမရဲ့ အတ္တကင်းမဲ့တဲ့အချစ်မျိုး (တနည်း) ကိုယ်ကျိုးမပါတဲ့အချစ်မျိုးနဲ့ ကျမ မောင့်ကို တန်ဖိုးထားပါတယ်။ တကယ်တမ်းဆိုရင်တော့ မိန်းမနဲ့ယောင်္ကျား ချစ်ကြတယ်ဆိုတာ “အတ္တ”ကြောင့်ပါ။ လူတယောက်က ကိုယ့်ကို ကောင်းတာလေးတွေပြောတဲ့အခါ၊ ပန်းကလေးတွေလာပေးတဲ့အခါ သဘောကျတတ်ကြတာ “အတ္တ”စိတ်ကြောင့်ပေါ့.. မောင်။ ဒါပေမယ့် မောင်ဟာ ကျမအတွက်ဘာမှ ရွေးချယ်ပြောနေစရာမလိုပဲ။ ပေးဆပ်စရာမလိုပဲနဲ့ကို ကျမက မောင့်ကို ရိုးရှင်းစွာချစ်မြတ်နိုးပါတယ်.. မောင်။

ကျမရဲ့ခံယူချက်က အချစ်ကအချစ်ပဲ၊ ဘ၀ဟာဘ၀ပါပဲ။ အချစ်နဲ့ ဘ၀ကို မရောယှက်ချင်ဘူးကွယ်။ ဘ၀ဆိုတာကို တည်ဆောက်တဲ့နေရာမှာ အချစ်က အနှောင့်အယှက်ဖြစ်လာနိုင်သလို၊ တယောက်နဲ့တယောက်ချစ်နေကြတဲ့ အချစ်ထဲမှာလည်း အဲဒီဘ၀ဆိုတာကြီးပါလာရင် အချစ်ဆိုတာ မခိုင်မြဲပဲ ပြိုကွဲသွားနိုင်လို့ပါ။ အနာဂတ်မရှိတဲ့အချစ်စစ်ဆိုတာ တကယ်ရှိသလား၊ မရှိသလားဆိုတာကိုတော့ ကျမသေချာမသိပါဘူး… မောင်။ ဒါပေမယ့် ကျမ မောင့်ကို တကယ့်ကို ချစ်မြတ်နိုးပါတယ်ကွယ်။

အချစ်ဆိုတာ ဘ၀ရှင်သန်မှူအတွက် အထောက်အပံ့တခုတော့ဖြစ်သင့်ပါတယ်။ ကျမဘ၀နဲ့ မနီးစပ်တဲ့မောင့်ကို ချစ်ရတာဆိုတော့ စိတ်ကူးယဉ်အငွေ့အသက်တွေနဲ့ ထုန်မွှန်းထားတဲ့ ၊ လက်တွေ့ကျင့်သုံးလို့မရတဲ့ အချစ်တခုလို့တော့ ကျမကို ဝေဖန်နိုင်ပါတယ်။ ဘ၀နဲ့မပတ်သက်ပဲ အချစ်ချည်းသက်သက်နဲ့ ကျမကို ချစ်ပါ..မောင်။ ပုံဖော်ထုဆစ်လို့မရနိုင်တဲ့ အိပ်မက်လေးတခုကို ဖြစ်ပျက်များစွာ ဖွဲ့စည်းနေတဲ့ဘ၀တခုမှာ သေတပန်၊ သက်တဆုံး ညစဉ်မက်နေစေဖို့တော့ ကျမ မတောင်းဆိုပါဘူးကွယ်။။။။

(ခ) အချစ်နှင့် ဂုဏ်ဒြပ်အကြောင်း

ကျမရဲ့ အချစ်ဟာ အားကိုးရာကလည်းမစခဲ့ဘူး၊ အထင်ကြီးရာကနေလည်း ပေါ်ပေါက်လာတာမဟုတ်ဘူး..မောင်။ မောင် ဘာပဲဖြစ်နေနေ၊ မောင့်ဘေးကနေ ကောင်းစေချင်တဲ့ စေတနာတွေနဲ့ ဖြည့်ဆည်းရပ်တည်နေချင်သူ သက်သက်ပါ..မောင်ရယ်။ အဲဒီလို ရပ်တည်မှူအတွက် ကျမတောင်းဆိုမှူက တခုတည်းပါ…။ ကျမကိုပြန်ချစ်ပေးပါ..မောင်။ ဒါဟာလည်း တယောက်ကတယောက်ကို ချစ်တဲ့အတွက် ကိုယ့်ကို ပြန်ပြီးချစ်စေချင်တဲ့ မသိစိတ်ရဲ့တောင်းဆိုမှူ သက်သက်ပါကွယ်။

(ဂ) အချစ်နှင့် တမ်းမက်မှူအကြောင်း

တမ်းမက်မှူဆိုတာ အချစ်လား..မောင်။ ကျမတော့ လက်မခံပါဘူး။ ဒီတမ်းမက်မှူမပါပဲနဲ့ အချစ်ဆိုတာ သူ့ဘာသာသူ သပ်သပ်ကို မွန်မွန်မြတ်မြတ်ဖွဲ့တည်နေတဲ့ အရာမျိုးပါ။ တနည်းအားဖြင့် အဲဒါ မေတ္တာပေါ့ ..မောင်။

အချစ်အပေါ်မှာ ခံယူပုံခြင်းမတူရင် အချစ်ကို အဓိပ္ပါယ်ဖွဲ့ဆိုတာချင်းလည်း ဘယ်တူပါ့မလဲ… မောင်ရယ် ။

(ဃ) အချစ်နှင့် ဖြည့်ဆည်းမှူအကြောင်း

အချစ်ဆိုတာ ရယူပိုင်ဆိုင်လိုခြင်းသက်သက်တော့ မဟုတ်ဘူး။ အချစ်ကို ရင်ထဲမှာသိမ်းထားနိုင်တဲ့လူတိုင်းဟာ အတူနေချင်စိတ်မရှိပဲနဲ့ ချစ်နေလို့ရပါတယ်.. မောင်။ အချစ်ဆိုတာ တအားကို နူးညံ့ပြီး သိမ်မွေ့မြင့်မြတ်တယ်လို့ ဆိုချင်တာပါ။ အချစ်ဆိုတာ လိုက်ရှာလို့ရတဲ့ အရာမဟုတ်ဘူး.. မောင်။ သူတွေ့ချင်တဲ့အချိန်မှာ အလိုလို တွေ့လာတတ်တဲ့ အရာမျိုးပါ။ တကယ် အချစ်စစ်လာပြီဆိုရင် ကိုယ့်အတ္တကိုခွာပြီး သူကောင်းတာကိုပဲဖြစ်စေချင်တာ၊ ဘာနဲ့ယှဉ်ယှဉ် ကိုယ်ပဲအနစ်နာခံလိုတာ၊ အရာရာတိုင်းမှာ သူကောင်းပါစေဆိုပြီး ဖြည့်ဆည်းပေးနေတာမျိုး” တဲ့ မောင်။ မောင်ဟာ ကျမနဲ့ သဘောထားချင်း ကိုက်ညီတာနဲ့ လုပ်လို့ ကိုင်လို့ ရနေတာနဲ့ ကျမကို ကောင်းအောင်လုပ်ပေးနေတာလေးတွေနဲ့ အချစ်ဖြစ်ပြီဆိုပြီး ထင်ယောင်ထင်မှား ချစ်ခဲ့တာမဟုတ်ပါဘူးကွယ်။

နားလည်မှူနဲ့ မျှဝေခံစားမှူဆိုတာ တဆက်တည်းပါ..မောင်။ ချစ်သူဖြစ်ရုံ သက်သက်နဲ့ life companion အဖြစ်ရပ်တည်နေသူတွေလိုမျိုး ကျမတို့ရော ရပ်တည်လို့မရဘူးလား။ မျှော်လင့်ကြမယ်၊ အဖြေရှာကြမယ်၊ တယောက်ပြသနာကို တယောက်ဖြေရှင်းပေးမယ်၊ သူ့ဒုက္ခ ကိုယ်ခံ၊ ကိုယ့်ဒုက္ခသူခံ။ တယောက်နဲ့တယောက် စိတ်မဆိုးပဲ၊ မနာကျည်းပဲ၊ အထင်မသေးပဲနဲ့ နားလည်မှူအပြန်အလှန်ရှိကြတာမျိုးပေါ့… မောင်။

အချစ်ဆိုတာ လူတော်တော်များများအတွက် အိပ်မက်လိုများ ဖြစ်နေမလားမသိဘူး။ ကျမအတွက်တော့ မောင့်အနားမှာ ရှိနေ၊ ဖြည့်ဆည်းပေးနေရတာနဲ့ကိုပဲ စိတ်ချမ်းသာမှူအပြည့်ရှိနေတဲ့ သူလေ။

(င) အချစ်နှင့်ဆင်ခြင်တုံတရားအကြောင်း

ကျမ မောင့်ကို ချစ်နေခြင်းဟာ မောင့်အတွက် ပူလောင်မှူမဖြစ်စေရဘူး။ ကျမက ပန်းတပွင့်ကို နေရောင်ခြည်မှာပွင့်လိုက်ရင် ဘယ်တော့များပွင့်ဖတ်ကလေးတွေ ညှိုးနွမ်းသွားစေမလဲဆိုပြီး ဖန်ပေါင်းချောင်ကလေးနဲ့အုပ်ပြီး ပွင့်စေချင်တဲ့ အချစ်မျိုးမဟုတ်ပါဘူး..မောင်။ မောင့်ကို ဘယ်အချိန်လှမ်းကြည့်လိုက်၊ ကြည့်လိုက် ချစ်တယ်၊ မောင်လမ်းလျှောက်နေတာ မြင်ရင်လည်း ကြည်နူးတယ်။ မောင် စာထိုင်ဖတ်နေတာကြည့်ပြီးတော့လည်း ချစ်နေတာပဲ။ မောင့်အကြောင်း တွေးလိုက်တဲ့အခါတိုင်းလည်း မုန်းစရာတခုမှ မရှိဘူး။ မောင့်ရဲ့ စိတ်တွေ ကျမဆီရောက်ရှိနေစရာမလိုအပ်ပါဘူး။ မောင်စိတ်ချမ်းသာသလို ဆုံးဖြတ်ပိုင်ခွင့်တွေ မောင့်ဆီမှာ အပြည့်အ၀ရှိပါတယ်။ ကျမရဲ့ အချစ်ဟာ ရယူပိုင်ဆိုင်ခြင်းလဲမရှိဘူး၊ ပေးဆပ်စရာလည်းမရှိဘူး။ မောင့်ကို အချစ်သက်သက်ဖြင့်သာ ကျမ ချစ်ပါတယ်.. မောင်။

တခုတော့ရှိတာပေါ့။ ဘယ်လောက်ပဲအချစ်စစ်စစ်၊ ကျမကို နာကျည်းအောင်လုပ်တယ်ဆိုရင်တော့ အချစ်စစ်ဆိုတာလဲ ထွက်ပြေးတတ်ပါတယ်..မောင်။ ကျမအပေါ်ကြိုက်သလောက်ဆိုးပါ၊ နာကျည်းအောင်တော့ မပြုမှူပါနဲ့ကွယ် ။

လူတယောက်က တယောက်ကိုချစ်နေရက်နဲ့ နောက်ထပ်လူတယောက်ကို တပြိုင်နက်တည်း ချစ်တယ်ဆိုတာ ဘယ်နည်းနဲ့မှ မဖြစ်နိုင်ပါဘူး။ ဖြစ်နိုင်တယ်ဆိုရင်တော့ ကိုယ့်ရင်ထဲမှာ ရှိပြီးသားအရာတခုကို အချစ်နဲ့ ထင်ယောင်ထင်မှားဖြစ်ခဲ့တာပဲ ဖြစ်နိုင်တယ်။ အချိန်ကာလရွေ့လျားလာတာနဲ့အမျှ အဲဒီအရာဟာ သံယောဇဉ်အဖြစ် ခိုင်မြဲလာခဲ့တာမျိုးပေါ့။ အိမ်ထောင်ရေးမပြေလည်မှူ၊ အချစ်ရေးမပြေလည်မှူတွေဖြစ်လာတဲ့အခါမှာ နောက်ဖြစ်လာတဲ့ အချစ်အပေါ်မှာ အရမ်းစွဲလမ်းသွားတတ်ကြတယ်လေ။ ဒီလိုမျိုးဖြစ်လာပြီဆိုရင်တော့ မြန်မာလူမျိုးတို့ရဲ့ ဘာသာရေး၊ လူမှူရေးကျင့်ဝတ်တို့နဲ့ ပြန်ပြီးဆင်ခြင်သင့်တယ်လို့ ကျမတော့ ထင်တယ်။
ဘယ်လိုလဲ..မောင်။ မောင့်အတွက် ချစ်သူနှစ်ယောက်တပြိုင်နက်ရှိ၊ မရှိ ကျမသေချာမသိနိုင်ပါဘူး။ ဘာပဲဖြစ်ဖြစ် မောင်ဟာ ကိုယ့်စိတ်ခံစားမှူကို သေချာခွဲခြမ်းစိတ်ဖြာနိုင်တဲ့ ဆင်ခြင်တုံတရား ရှိလိမ့်မယ်လို့တော့ ကျမ မျှော်လင့်ထားပါတယ်။

(စ) အချစ်နှင့် အကြောင်းပြချက်

လူတယောက်ကို ချစ်မိပြီဆိုရင် အကြောင်းပြချက်လိုသလားမောင်။ ဘာဖြစ်လို့ ချစ်တယ်ဆိုတာတော့ ကျမကို မမေးပါနဲ့ကွယ်။ ရုပ်ချောလို့ ချစ်တယ်၊ ချမ်းသာလို့ချစ်တယ်၊ ပညာတော်လို့ချစ်တယ်၊ စသည်ဖြင့် ကျမမှာ Reason တွေမရှိဘူး.. မောင်။ အကြောင်းပြချက်ဆိုတာ အချိန်နဲ့အမျှ ပြောင်းလဲသွားတတ်တဲ့ သဘောရှိတယ်လေ။ အချစ်ဆိုတာ ဖန်တီးယူလို့မရပါဘူး။ သူ့ဟာသူ ရင်ထဲရောက်ရှိလာတဲ့အရာကို ကိုယ်က လက်သင့်ခံပေးလိုက်ရတာမျိုးပါ။ အချစ်မှာ အကြောင်းပြချက်ရှိတယ်ဆိုရင် ဒါဟာ Love မဟုတ်ဘူး၊ Like ပဲဖြစ်မယ်လို့ ကျမတော့ ယူဆတယ်။

ကိုယ်ချစ်တဲ့သူရဲ့ အကြောင်းကို ဘယ်သူမဆိုသိချင်ကြတာချည်းပါပဲ.. မောင်။ ဒါပေမယ့် … ကိုယ်သိလိုက်ရတဲ့ အကြောင်းအရာတွေထဲမှာ ကိုယ်နဲ့မကိုက်ညီတာတွေပါမယ်ဆိုရင်လည်း ဒီအချစ်က ပျက်ပြယ်သွားမှာမဟုတ်ဘူး။ ယိုင်နဲ့သွားမှာ မဟုတ်ဘူး။ မြင်မြင်ချင်း ချစ်တယ်ဆိုတာ တကယ်တော့ မရှိပါဘူး..မောင်၊ မြင်မြင်ချင်း စိတ်ဝင်စားတယ်ဆိုတာလောက်ပဲ ဖြစ်နိုင်ပါတယ်။ အချစ်မှာ မျက်စိမရှိဘူးဆိုတာဟာ တနည်းအားဖြင့်တော့ ကျိုးကြောင်းဆင်ခြင်တုံတရားမရှိ်ဘူးပေါ့… မောင်။ ဒါကြောင့် အချစ်မှာ အကြောင်းပြချက်မရှိသလို ဆင်ခြင်တုံတရားမရှိပါဘူး။

(ဆ) အချစ်နှင့် အတ္တအကြောင်း

အချစ်အတွက်ဆိုရင် ယောင်္ကျားတွေက ပိုမိုက်သလား၊ မိန်းမတွေက ပိုမိုက်မဲသလား..မောင်။ ယောင်္ကျားတွေကတော့ ကိုယ့်အတွက် ပိုကြည့်တဲ့အတ္တပါတဲ့အတွက် ယောင်္ကျားတွေက မိန်းမတွေလောက်တော့ သိပ်မမိုက်မဲဘူးလို့ ကျမတော့ထင်တယ်။ မိန်းမတွေက ဆင်ခြင်တုံတရားမဲ့ချစ်တတ်တဲ့အတွက် နူနူရွဲရွဲ၊ မိုက်မိုက်မဲမဲကို ဇွတ်တိုးချစ်တတ်ကြတယ်။ အချစ်ကို ကိုးကွယ်တယ်ဆိုတာ တနည်းအားဖြင့် ကျိုးကြောင်းဆင်ခြင်တုံတရားမဲ့စွာ ချစ်တာပါပဲ။ အချစ်ဆိုတာ ဘ၀ရဲ့ အစိတ်အပိုင်းတခုပါပဲ။ ဘ၀ရဲ့ဘေးမှာ အချစ်က ကပ်လိုက်မှသာ အဆင်ပြေမယ်။ အချစ်က ဘ၀ကိုဦးဆောင်မယ်ဆိုရင်တော့ ဘ၀က အပိုင်းပိုင်းကျိုးနိုင်တယ်လေ။ အချစ်က စိတ်ဝင်စားမှူအပေါ်တော့ မူတည်ပါတယ်။ လူတယောက်ကို ချစ်မိပြီဆိုရင် သူ့ရဲ့စရိုက်၊ သူ့ရဲ့သဘာဝလေးတွေ၊ ပြီးတော့ သူ့ရဲ့ဘာသာစကားကို စိတ်ဝင်စားမှ အချစ်ဆိုတာ တဆင့်တက်ဖြစ်ပေါ်လာနိုင်တာမျိုးပေါ့။ အချစ်ကြီးတယ်လို့ပြောရင် ဒါဟာ အတ္တကြီးတာပါပဲ…မောင်။

သူ့အတွက်ပဲ၊ သူရှိတဲ့နေရာ၊ သူမြင်သာ ကြားသာတဲ့နေရာမှာနေမယ်။ ဘယ်လောက်ဝေးဝေး ခြေလျင်လျှောက်နိုင်တယ်၊ အဲဒီခရီးမှာ လဲနေရင်ပြန်ထမယ်။ သူ့မျက်နှာလေးမြင်ရင် နာတာတွေ ပျောက်သွားမယ်။ သေချာစဉ်းစားကြည့်ပါ….မောင်။ အမှန်တော့ ဒါတွေဟာ ကိုယ့်ရဲ့အတ္တကြောင့် ကိုယ့်ကိုယ်ကိုယ် ကျေနပ်မှူပေးနေတာပါ။ အတ္တကြီးလေလေ၊ ကျိုးကြောင်းဆင်ခြင်မှူတရား အားနည်းသွားလေပဲပေါ့…မောင်။

(ဇ) အချစ်နှင့် ဆိုးကျိုးများအကြောင်း

အချစ်ဆိုတာကို ဘ၀နဲ့ရောယှက်လိုက်တဲ့အခါမှာ ဆိုးကျိုးလေးတွေဖြစ်လာတတ်တာမျိုး ကျမတို့ပတ်ဝန်းကျင်မှာ ရှိဖူး၊ မြင်ဖူးမှာပေါ့နော်..မောင်။ မိန်းမတွေဟာ မိဘ၊ဆွေမျိုး၊ အပေါင်းအသင်း အားလုံးကိုဆန့်ကျင်ပြီး ဘ၀ရော၊ စည်းစိမ်ရော ပုံပေးချစ်တတ်လေ့ရှိတယ်။ အချစ်စစ်မှာ ဆင်ခြင်တုံတရားမရှိဘူးလို့ဆိုခဲ့ပေမယ့် ဒီလိုအချစ်မျိုးကျတော့ နောက်ကထိန်းပေးနိုင်မယ့် တစုံတရာတော့ လိုအပ်နေပြီလေ။

တခါတရံမှာ အချစ်ကို ရင်ထဲမှာမထားပဲ ဘ၀ထဲရောထည့်လိုက်တဲ့အခါ၊ ဘ၀ပါလိုက်ပြီး ပျက်ရတာမျိုးတွေရှိတတ်တယ်..မောင်။ ဒါကြောင့် အချစ်ရဲ့နောက်မှာ သတိဆိုတာလေး ကပ်လိုက်ဖို့လိုတယ်။ ကျမ မောင့်ကိုချစ်တယ်။ ပိုင်ဆိုင်ဖို့မကြိုးစားပဲနဲ့ပေါ့လေ။ ဝေးဝေးကနေကြည့်လိုက်၊ နီးနီးကနေ ကြည့်လိုက်၊ လိုအပ်မယ်ထင်ရင်လည်း ဖြည့်ဆည်းတဲ့အခါ ၀င်ဖြည့်ဆည်းပေးလိုက် ၊ ဒီလိုအနေအထားမျိုးလေးနဲ့ ကျမ မောင့်ကို ချစ်ပါတယ်။ ကျမရဲ့ အတ္တကို ရှေ့တန်းတင်ပြီး မောင့်ကိုပိုင်ဆိုင်ဖို့ မကြိုးစားချင်ဘူးကွယ်။ ဒီလိုပြောလို့ ကျမအပေါ် မောင် အခွင့်ကောင်းယူမယ်ဆိုရင်တော့ ဘာတတ်နိုင်မလဲ။ မောင်မှ မချစ်တော့ရင်လည်း ကြေကွဲနေရုံပေါ့နော်.. မောင်။

(ဈ) အချစ်နှင့် ဖူးစာရေစက်အကြောင်း

အချစ်ဆိုတာ သိပ်ကိုခမ်းနားကြီးကြယ်၊ မြင့်မြတ်သတဲ့ …မောင်။ ဖူးစာရေစက်ဆိုတာကို လူတွေက အချစ်နဲ့ယှဉ်ပြီး တွေးလေ့ရှိကြတယ်။ ကျမတို့ တယောက်နဲ့တယောက်အတိတ်ကံပါလို့ ချစ်ခွင့်ရကြတယ်။ တယောက်နဲ့တယောက် အဆင်မပြေလို့ မဆုံစည်းနိုင်ကြရင်လည်း အတိတ်ရေစက်ကံမပါဘူး လို့ ပြောတတ်ကြတယ်။ အတိတ်ရေစက်ကြောင့် ဖူးစာကံပါပြီး အိမ်ထောင်မြဲကြတာဟာ အချစ်ကြောင့်လဲမဟုတ်ဘူး၊ သံယောဇဉ်ကြောင့်လဲမဟုတ်ဘူး.. မောင်၊ အဲဒါကတော့ မိန်းမတယောက်ရဲ့ မိခင်စိတ်နဲ့ နှစ်ယောက်စလုံးရဲ့ ခံယူချက်မြဲမြံတာနဲ့ဆိုင်မယ်လို့ ကျမတော့ ယူဆတယ်။ အချစ်မပါပဲနဲ့လည်း အိမ်ထောင်တခုကို မြဲအောင်တည်ဆောက်သွားတဲ့သူတွေရှိသလို၊ အိမ်ထောင်မပြုပဲနဲ့လည်း အချစ်ကို တည်ဆောက်နေကြသူတွေလည်း ဒုနဲ့ဒေးပါပဲ။ တယောက်နဲ့တယောက် အိမ်ထောင်ပြုရမှ ၊ လက်ထပ်ရမှ ချစ်လို့ရတာမှမဟုတ်တာ။ လက်မထပ်ပဲနဲ့လည်း တသက်လုံးချစ်သွားလို့ရတာပဲ မဟုတ်လား..မောင်။

(ည) အချစ်နှင့် ကံတရားအကြောင်း

အချစ်က တကယ့်ကိုလျှို့ဝှက်နက်နဲပါတယ်.. မောင်။ ဒါကြောင့်လဲ လူမျိုးမတူပဲ၊ အဆင့်အတန်းမတူပဲ ချစ်နေနိုင်စွမ်းကြတာပေါ့။ ကျမတို့ ဗုဒ္ဓဘာသာမှာ ကောင်းတာပြုရင် ကောင်းတာဖြစ်မယ် လို့ ဘုရားကဟောတယ်။ အကယ်၍ အချစ်က ဘ၀အတွက်အထောက်အပံ့ဖြစ်နိုင်မယ်ဆိုရင်တော့ သိပ်ကိုကံကောင်းတာပဲပေါ့..မောင်။ ကံကိုအခြေပြုပြီးတော့ပဲ လူတွေက အချစ်ကံကောင်းတယ်၊ အချစ်ကံခေတယ်လို့ ပြောကြတယ်မဟုတ်လား။ အဆောင်အယောင်၊ အခမ်းအနားတွေနဲ့ ပြည့်စုံနေပြီး၊ ကြင်နာယုယမှူမျိုး၊ ဂရုစိုက်မှူမျိုး၊ ဦးစားပေးမှူမျိုး၊ ကိုယ့်အတွက်ထည့်စဉ်းစားပေးမှူမျိုး မရရှိနိုင်ဘူးဆိုရင်လည်း ဒါဟာလည်း ကံမကောင်းခြင်းပါပဲ။

လောကမှာ ကိုယ့်ကိုယ်ကိုယ်ထက်ချစ်နိုင်တဲ့သူ မရှိသလောက်ရှားပါတယ်…မောင်။ ဒါပေမယ့် ကိုယ့်ကိုယ်ကိုယ်နဲ့ တန်းတူထားပြီး ကျမ မောင့်ကို ချစ်မြတ်နိုးပါတယ်။

(တ) အချစ်နှင့် ဦးစားပေးမှူအကြောင်း
အောင်မြင်ထင်ပေါ်နေတဲ့ မိန်းမတွေဟာ လက်တွဲဖော်ရွေးရတာ၊ တကယ်စစ်မှန်တဲ့ချစ်သူတယောက်၊ အိမ်ထောင်ဖက်ကောင်းတယောက်ရဖို့ အတော်ကို ခက်ခဲပါတယ်…မောင်။ တကမ္ဘာလုံးရဲ့ မိရိုးဖလာမှာ “နှင့် ဇနီး” ပဲရှိတတ်ပြီး၊ “နှင့် ခင်ပွန်း”ဆိုတာမရှိတဲ့အတွက် ထက်မြက်အောင်မြင်လွန်းတဲ့ မိန်းမတယောက်ကို လက်တွဲဖို့ ယောင်္ကျားတိုင်းလိုလိုက အတော်ကိုစဉ်းစားသုံးသပ်ကြပါလိမ့်မယ်။ အချစ်မှာ သည်းခံမှူဆိုတာ ပါဝင်နေပေမယ့် ကိုယ့်ရဲ့အတ္တနဲ့ မာနကိုထိခိုက်စေလာနိုင်တဲ့သူကို လက်တွဲဖော်အဖြစ်ရွေးဖို့ စဉ်းစားကြတာမျိုးပေါ့။
------- ။ ---------။ ---------

ချစ်တယ်လို့မပြောပဲ ကိုယ့်အပေါ်ချစ်ကြောင်းအလိုလိုသိနေရတာ သိပ်ကောင်းတာပဲ။ တယောက်နဲ့တယောက် တကယ်ချစ်မြတ်နိုးရင် စကားတခွန်းမှ မပြောပဲလဲ တယောက်နဲ့တယောက် စိတ်ချင်းသိနိုင်စွမ်းတွေရှိပါတယ်။ အဲဒီအချစ်လေးက သိပ်ကို လှပပါတယ်…မောင်။

တကယ်တော့ လူနှစ်ယောက်ဟာ တကယ်သာချစ်နေကြတယ်ဆိုရင် တယောက်နဲ့တယောက် ဖွင့်ပြောပြနေစရာမလိုပါဘူး၊ အချစ်ဆိုတာ ပန်းချွေမယ့်လေရိုင်းမဟုတ်ဘူးလေ၊ ပန်းရနံ့ကို ဆောင်ကျဉ်းပေးမယ့် လေပြေလေညှင်းလေးပါ… မောင်ရယ်။

မှတ်ချက်။ ။ အချစ်အကြောင်းပြောကြမယ်စာအုပ်ကိုဖတ်၍ ခံစားရေးသားပါသည