ညဥ့်လေ အေးအေး တဖြူးဖြူးတိုက်ခတ်နေတဲ့ ကျမရဲ့ အပေါ်ဆုံးထပ်တိုက်ခန်းလေးမှာ ဒီလိုအချိန်မျိုး ကျမ တခါမှ ထွက်မရပ်ဖူးပါ။
ကြည့်စမ်းပါဦး ….ဒီညမှာ ကြယ်တွေ စုံလင်လှပါလား၊ ကြယ်စုံတဲ့ ညတညရဲ့အလှကို ကျမခုမှ ခံစားဖူးတာ အမှန်ပါ။
ဟုတ်တယ်…
အခု ညဥ့် နှစ်နာရီကျော်သွားပြီ။ အိပ်မရတဲ့ ညပေါင်းများစွာ ရှိခဲ့ဖူးပေမယ့် ဒီလို ၀ရံတာမှာ ထွက်ရပ်ဖို့ စိတ်ကူးမျိုး တခါမှ မရှိခဲ့ဖူးဘူးလေ။ ခုတော့ ဒီစိတ်ကူးလေးကို ကျမကျေးဇူးတင်သင့်တယ်။ နေ့ခင်းတုန်းက ဥဒဟိုဖြတ်သန်းသွားလာနေကြတဲ့ အိမ်ရှေ့လမ်းမကြီးပေါ်မှာတောင် ကားကြီး၊ ကားငယ်၊ တစီးစ၊ နှစ်စီးစလောက်ပဲ ဖြတ်သန်းသွားနေကြတယ်။ လှပတဲ့ နေရောင်ခြည်အောက်မှာ လူကြီး၊ လူငယ် အစုံဖြတ်သန်းသွားလာကြတဲ့ ဒီလမ်းမကြီးဟာ အခုတော့လည်း တိတ်ဆိတ်၊ ခြောက်ကပ်လို့ပါလား။ ဒါဟာ သဘာဝတရားရဲ့ လှည့်စားမှူလေလား၊ သူလည်း နေ့နဲ့ည တလှည့်ဆီပြောင်းလဲရမယ့် သူ့တာဝန် သူထမ်းဆောင်နေတာပါပဲ။
ဟူးးးးးးးးးးး
ကျမရဲ့သက်ပြင်းချသံနဲ့အတူတူ ကျမရဲ့အချစ်တွေ၊ ကျမရဲ့အမုန်းတွေ၊ ကျမရဲ့အာဃာတတွေ၊ အလိုလောဘကြီးသူအဖြစ် အပြစ်မြင်ကြမှာစိုးလို့ သိုဝှက်ထားတဲ့ ကျမရဲ့ဖြစ်ချင်လိုမှူတွေကို ညဥ့်လေအေးအေးက သယ်ဆောင်ပျောက်ဆုံးသွားရင် သိပ်ကောင်းမှာပဲလို့ ကျမတွေးမိတယ်။
ဒီအချိန်မှာ ကျမ မှီတည်နိုင်စရာ ပုခုံးစွန်းလေးတခုရှိရင်ကောင်းမယ်။ ဟိုအရင်က အဆိုး၊ အကောင်းတွေ ကြုံတွေ့တိုင်း လက်တွဲရင်ဆိုင်ခဲ့တဲ့ ချစ်သူရဲ့ လက်တဖက်လည်း ဘယ်ဆီကမ်းလင့်နေပြီလည်း မသိ။ သိပ်မကြာသေးခင် အချိန်ကာလတခုက “မ အနားမှာရှိချင်တယ် ၊ မ ငိုချင်ရင် ၊ ကျွန်တော့် ရင်ခွင်မှာ နှစ်သိမ့်ပေးချင်တယ်” ဆိုတဲ့ လူတယောက်လည်း ဘယ်ဆီ ခြေဦးလှည့်နေပြီလည်းမသိ။
တခါ၊ တခါ ကိုယ့်ကိုယ်ကို ဘာဖြစ်ချင်နေမှန်းမသိအောင် ခံစားရတဲ့အခါမျိုးမှာ၊ ကိုယ့်စိတ်ကို ကိုယ့်ထက်ပိုပြီးနားလည်နိုင်မယ့်သူမျိုး ကျမ အလိုရှိတယ်။ ဒါပေမယ့် … ဒါဟာလည်း ဘုရားသခင် မဖြည့်ဆည်းပေးနိုင်တဲ့ ကျမရဲ့ လိုအင်ဆန္ဒသက်သက်ပါပဲ၊
ဘာကြောင့်များ ကျမဟာ ဆုတောင်းမကောင်းသူ ဖြစ်ရတာပါလိမ့် …အခုဆို ကျမ အသက် နှစ်ဆယ့်ငါးကျော်လာခဲ့ပြီ။ ဟိုးငယ်ငယ်တည်းက အခုချိန်ထိ တောင့်တမိနေတဲ့ အဖေရယ်၊ အမေရယ် စုံညီတဲ့မိသားစုဘ၀လေးတခုလည်း ကျမမရခဲ့ဘူး၊ ကျမ ကြိုးစားပမ်းစားတည်ထောင်ခဲ့တဲ့ ကျမကိုယ်ပိုင်ဘ၀လေး တခုလည်း ပြိုပျက်သွားခဲ့ပြီ။ ဒါပေမယ့် ကျမတတ်ထားတဲ့ ပညာရပ်နဲ့ တင့်တယ်တဲ့အလုပ်အကိုင်လေး တခုတော့ ကျမ ရခဲ့ပြီ၊ ကျမမေမေကိုလည်း လူတွေကြားမှာ မျက်နှာမငယ်အောင်ထားနိုင်ခဲ့ပြီ ဖြစ်တဲ့အတွက် ကျမကျေနပ်ပါတယ်။
ဟော ……ကြယ်လေးတလုံး ကြွေကျသွားတာ ကျမ မြင်လိုက်ရတယ်။
ကြယ်ကြွေချိန် ဆုတောင်းရင် ဆုတောင်းပြည့်တယ်လို့ ကျမ ကြားဖူးတယ်။
စဉ်းစားစမ်း…. စဉ်းစားစမ်းကျမ ဘာကို ဆုတောင်းရင်ကောင်းမလဲ ? သိန်း၅၀၀ ထီဆုကြီးပေါက်ပါစေလို့ ဆုတောင်းရမလား ….. ဒါမှမဟုတ်ဒီထက်ပိုလစာကောင်းတဲ့ အလုပ်တခုရပါစေလို့ ဆုတောင်းရမလား ….. ဒါမှမဟုတ်ချစ်ဦးသူနဲ့ ပြန်ဆုံတွေ့ရပါစေလို့ ဆုတောင်းရမလား ….. ဒါမှမဟုတ်လောကကြီးရဲ့ အချိန် နာရီတွေ နောက်ပြန်လှည့်သွားစေနိုင်တဲ့ ပါဝါမျိုးရရှိပါစေလို့ ဆုတောင်းရမလား .. ဒါမှမဟုတ် …. ဒါမှမဟုတ် ….အို … ကျမမှာလိုအင်တွေ ဒီလောက်များသလားကွယ်။
ပတ်ဝန်းကျင်တခုလုံးကတော့ တိတ်ဆိတ်နေပါတယ်။ ကျမမှာသာ နောက်ဆုံး လက်ကျန်ဆုတောင်းလေး တခုတောင်းဖို့ ရင်ခွင်တခုလုံး ဆူညံနေတယ်။
ဒါနဲ့ပဲ အရင်က ကျမရေးဖူးတဲ့ ကဗျာတပုဒ်ကို အမှတ်မထင်သတိရမိတယ်။
“ ငါ့သံယောဇဉ် အမျှင်ဖြတ်မှ
နင်နဲ့ငါ ဆုံတွေ့ခွင့်ရမှာလား ?
ငါ့ရင်ထဲက အချစ်ကိုသတ်မှ
နင်နဲ့ ငါ့ခင်မင်မှူ ရှေ့ဆက်တိုးလို့ရမှာလား ?
ဒါဆိုရင်တော့
ငါဟာ ....
ကြယ်ကြွေချိန် ဆုတောင်းပြည့်ဖို့ ကြယ်ကြွေဖို့ ဆုတောင်းရသူလို ဖြစ်နေလိမ့်မယ် ။။။”
ကျမရင်ထဲမှာ ဟာသွားတယ် ….
သေချာတာတခုကတော့ ကျမရဲ့တောင်းဆုအတွက် ကြယ်ပွင့်လေးတွေ ဘယ်လောက်ပဲစတေးပေမယ့်၊သူဟာ ကျမဆီ ဘယ်တော့မှပြန်လာမယ့်သူတယောက် မဟုတ်တော့ပါဘူးကွယ် ...
ဒီလိုပါပဲ ....ကျမဟာ ဘယ်တော့မှ မပြည့်နိုင်တော့မှန်းသိတဲ့ တောင့်တမှူတွေနဲ့ အိမ်ရှေ့ဝရံတာလေးမှာ အချိန်တော်တော်ကြာ ရပ်နေမိတယ် ။။။။။။။
No comments:
Post a Comment